༉  ལྷུན་རྩེ་སྒང་ཟུར་ལས་ཨིན་མི་བསོད་ནམས་དབང་མོ་གིས་ གླུ་གཞས་ཁྲུང་ལ་ཡར་ཡར་ཟེར་བའི་རང་ལུགས་འབྲུག་པའི་གཞུང་སྒྲ་ ཡོངས་གྲགས་ཅན་འདི་འཐེན་ཏེ་འདུག འ་ནཱི་གཞུང་སྒྲ་འདི་ སྔར་སྲོལ་གྱི་ལུགས་ གདངས་དབྱངས་རིང་སུ་སྦེ་འཐེན་དོ་ཡོདཔ་ཨིན། གླུ་ཚིག་ལྟར་དུ་འབད་བ་ཅིན་ ག་ནི་བ་གོ་ཡངས་པའི་ས་གནས་དེ་ཚུ་ ཁྱད་དུ་འཕགསཔ་སྦེ་བརྩིཝ་ཨིན་པས། དེ་ཡང་ དགུང་སྟོད་བདེ་ལེགས་ཡངས་པའི་ནང་། །ཁྲི་གདུགས་ཉི་མ་བཞུགས་པའི་ཁྲི། །གངས་སྟོད་བདེ་ལེགས་ཡངས་པའི་ནང་། །སེང་ཆེན་དཀར་མོ་བཞུགས་པའི་ཁྲི། །མཚོ་སྟོད་བདེ་ལེགས་ཡངས་པའི་ནང་། །གསེར་མིག་ཉ་མོ་བཞུགས་པའི་ཁྲི། །གཡུས་སྟོད་བདེ་ལེགས་ཡངས་པའི་ནང་། །ཡབ་ཡུམ་གཉིས་ཀུ་བཞུགས་པའི་ཁྲི་ཟེར་ དང་ཕུ་གི་གླུ་གཞས་དེ་ཚུ་མང་ཤོས་ཅིག་ གངས་སྟོད་དགུང་སྟོད་བསྐོར་ར་རྐྱབ་སྟེ་འཐེན་སྲོལ་ཡོདཔ་ཨིན། ཨིན་རུང་ དཔེ་དེ་ཚུ་ལུ་སྦྱར་ཏེ་འབད་རུང་ དོན་ངོ་མ་ གཞི་ག་ཅི་ལུ་བཞག་སྟེ་བརྩམས་བརྩམས་ཨིན་ན་ བརྩམ་མི་ཁོ་ར་ལུ་རགས་ལས་ནི་དང་ གོ་བ་ལེན་མི་རང་རང་སོ་ལུ་རགས་ལས་ནི་ཨིནམ་ད་ འ་ནཱི་བཟུམ་གྱི་གླུ་གཞས་འཁྲུངས་ལ་ཡ་ཡ་འདི་ལུ་ ཚིག་སོ་སོ་བཙུགས་ཏེ་འཐེན་འཐེནམ་གཞན་མི་ཡང་འདུག གླུ་གཞས་ཨ་ནཱི་འདི་འབད་བ་ཅིན་ རང་གི་གཡུས་བཀོ་བཞག་སྟེ་ཐག་རིང་ས་ཅིག་ཁར་འགྱོ་སྡོདཔ་ད་ རང་གི་གཡུས་དང་ཕམ་དྲན་ཏེ་འཐེན་འཐེནམ་བཟུམ་གྱི་སྣང་བ་ཅིག་ཤར་ནི་འདུག ལོགས་ཅིག་ཁ་ལས་འབད་བ་ཅིན་ ཆོས་ཐམས་ཅད་རྟེན་འབྲེལ་ཨིན་པའི་བརྡ་ཅིག་ཡང་སྟོནམ་ཨིན་པས།